काठमाडौं। समूह चरणको अन्तिम खेलमा नेपालले श्रीलङ्कालाई ६–० गोलले हराउँदै साफ महिला च्याम्पियनसिपको सेमिफाइनलमा प्रवेश गरेको छ ।
दशरथ रङ्गशालामा बिहीबार भएको समूह ‘बी’ को अन्तिम खेलमा नेपाललाई जिताउन रेखा पौडेलले दुई गोल, सविता रानामगर, सावित्रा भण्डारी (साम्बा) अमिषा कार्की र रश्मीकुमारी घिसिङले एक एक गोल गर्नुभयो ।
पहिलो हाफमा चार गोल गरेको नेपालले दोस्रो हाफमा दुई गोल थपेको थियो । खेलभर रक्षात्मक रणनिति बनाएको श्रीलङ्काले गोल गर्न लायक अवसर बनाउन सकेन ।
तीन खेलबाट सात अङ्क बनाएको नेपाल समूह विजेता र सात अङ्क बनाएको भुटान समूह उपविजेता बन्दै सेमिफाईनलको अन्तिम चारमा पुगेको छ।
बिहीबार नै भएको यही समूहको अर्को खेलमा भुटानले माल्दिभ्सलाई १३–० गोलले हराएको थियो । नेपालले भुटानलाई गोल अन्तरका आधारमा पछि पारेको हो ।
यस समूहबाट माल्दिभ्स र श्रीलङ्का बाहिरिए ।
अब खेल सेमिफाइनलमा नेपालले समूह ‘ए’ को उपविजेता भारतसँग खेल्नेछ । र यस्तै अर्को सेमिफाइनलमा साविक विजेता बङ्गलादेश र भुटानबिच प्रतिस्पर्धा हुनेछ ।
दुबै सेमिफाइनल खेल आइतबार दशरथ रंगशालामा हुनेछ ।
