ईकोनोमिक खबर, काठमाडौं।
नेपाल र मलेसिया सरकारबीच भएको श्रम समझदारी (एमओयू) आजदेखि औपचारिक रुपमा कार्यान्वयनमा आएको हो । क्वालालम्पुरमा तीन दिनदेखि चलेको दुवै देशको प्राविधिक कमिटीको बैठकमा नयाँ समझदारीअनुसार श्रमिक आपूर्ति गर्नेसम्बन्धी सहमति भएको छ।
नेपाल र मलेसियाबीच भएको समझदारीअनुसार मलेसियामा कामदार पठाउँदा लाग्ने सेवा शुल्क, आतेजाते हवाई टिकट, प्रवेशाज्ञा शुल्क, स्वास्थ्य परीक्षण, सुरक्षा जाँच लगायत खर्च रोजगारदाताले नै व्यहोर्ने छन्। विगतमा नेपाली कामदारसँग लिदै आएको अतिरिक्त शुल्क समझदारीपछि नलाग्ने व्यवस्था गरिएको छ। मलेसियामा कार्यरत नेपाली कामदारले आफ्नो परिवारको निकटम् सदस्यको मृत्यु भएमा बढीमा १५ दिनका लािग स्वदेश आउन पाउने प्रावधान समावेश गरिएको छ । कार्यस्थलमा हुने कामदारको दुर्घटना बीमा र स्वास्थ्य बीमालाई मलेसियाको कानूनले कामदारको सन्दर्भमा लागू गरेको व्यवस्था नेपाली कामदारका हकमा समेत लागू हुनेछ।
नयाँ एमओयूले कामदारको करार अवधि दुई वर्ष तोकेको छ, यसअघि कामदारको करार अवधि तीन वर्ष थियो । नेपालले १५ महिनापछि मलेसियाको रोजगारी खुलाईएको छ।
