काठमाडौं। अन्तर्राष्ट्रिय बजारमा सुनको मूल्य घटेसँगै स्थानीय बजारमा समेत कमी आएको हो। लामो समयदेखि बढ्दै गएको सुनको मूल्य पछिल्लो एक सातादेखि घट्दै गएको हो ।
नेपाल सुनचाँदी व्यवसायी महासङ्घका अनुसार पछिल्लो एक साताको अवधिमा बजारमा सुनको मूल्य प्रतितोलामा १ हजार ५ सय रुपैयाँले कमी आएको हो।
एक साताको अवधिमा सुनको मूल्य निरन्तर घट्दै गएको तथ्याङ्कले देखाएको छ । महासङ्घका अनुसार गत साता एकतोलाको १ लाख १९ हजार पाँच सय रुपैयाँमा कारोबार भएको सुनको मूल्य आइतबार घटेर १ लाख १८ हजार रुपैयाँमा कारोबार भएको हो ।
पछिल्लो समय अन्तर्राष्ट्रिय बजारमा सुनको मूल्य घटेकाले त्यसको प्रभाव स्थानीय बजारमा पर्न गएको हो । आइतबार अन्तर्राष्ट्रिय बजारमा सुनको मूल्य घटेर प्रतिऔँस २ हजार २४ डलरमा कारोबार भएको छ ।
नेपालमा अहिलेको बजारमा सुनको मूल्य घटे पनि कारोबार भने बढ्न नसकेको व्यवसायीको भनार्इ छ । आर्थिकमन्दीका कारणले माघ महिनामा विवाहको लगनको सिजनमा पनि कारोबार बढ्न नसकेको व्यवसायीको भनाई छ ।
आर्थिक मन्दीको प्रभावसँगै उपभोक्ताको क्रयशक्ति बढ्न नसक्दा सुनको कारोबार बढ्न नसकेको व्यवसायीको भनाई छ । लगनको सिजन भए पनि न्युरोडका सुन पसलमा चहलपहल भने न्यून देखिन्छ ।
यसैबिच चाँदीको मूल्यमा समेत कमी आएको छ । गत साता एकतोलाको १ हजार ४१५ रुपैयाँमा कारोबार भएको चाँदीको मूल्य आइतबार घटेर एकतोला १ हजार ३९० रुपैयाँमा कारोबार भइरहेको छ ।
